“Mā, bhikkhave, puññānaṃ bhāyittha. Sukhassetaṃ, bhikkhave, adhivacanaṃ yadidaṃ puññāni. Abhijānāmi kho panāhaṃ, bhikkhave, dīgharattaṃ katānaṃ puññānaṃ dīgharattaṃ iṭṭhaṃ kantaṃ manāpaṃ vipākaṃ paccanubhūtaṃ. Satta vassāni mettacittaṃ bhāvesiṃ. Satta vassāni mettacittaṃ bhāvetvā satta saṃ­vaṭṭa­vi­vaṭṭa­kappe nayimaṃ lokaṃ punāgamāsiṃ. Saṃvaṭṭamāne sudāhaṃ, bhikkhave, loke ābhassarūpago homi, vivaṭṭamāne loke suññaṃ brahmavimānaṃ upapajjāmi.

Tatra sudaṃ, bhikkhave, brahmā homi mahābrahmā abhibhū anabhibhūto aññadatthudaso vasavattī. Chat­tiṃsak­khat­tuṃ kho panāhaṃ, bhikkhave, sakko ahosiṃ devānamindo; ane­kasatak­khat­tuṃ rājā ahosiṃ cakkavattī dhammiko dhammarājā cāturanto vijitāvī jana­padat­thāva­riyap­patto satta­ratana­saman­nā­gato. Tassa mayhaṃ, bhikkhave, imāni satta ratanāni ahesuṃ, seyyathidaṃ— cakkaratanaṃ, hatthiratanaṃ, assaratanaṃ, maṇiratanaṃ, itthiratanaṃ, gaha­pati­ratanaṃ, pari­ṇāya­ka­ratana­meva sattamaṃ. Parosahassaṃ kho pana me, bhikkhave, puttā ahesuṃ sūrā vīraṅgarūpā para­se­nappa­maddanā. So imaṃ pathaviṃ sāgara­pariyan­taṃ adaṇḍena asatthena dhammena abhivijiya ajjhāvasinti.

Passa puññānaṃ vipākaṃ,
Kusalānaṃ sukhesino;
Mettaṃ cittaṃ vibhāvetvā,
Satta vassāni bhikkhavo;
Satta­saṃ­vaṭṭa­vi­vaṭṭa­kappe,
Nayimaṃ lokaṃ punāgamiṃ.

Saṃvaṭṭamāne lokamhi,
homi ābhassarūpago;
Vivaṭṭamāne lokasmiṃ,
suññab­rah­mū­pago ahuṃ.

Sattakkhattuṃ mahābrahmā,
vasavattī tadā ahuṃ;
Chat­tiṃsak­khat­tuṃ devindo,
devaraj­ja­makāra­yiṃ.

Cakkavattī ahuṃ rājā,
jambumaṇḍassa issaro;
Muddhāvasitto khattiyo,
manussādhipatī ahuṃ.

Adaṇḍena asatthena,
vijeyya pathaviṃ imaṃ;
Asāhasena kammena,
samena manusāsi taṃ.

Dhammena rajjaṃ kāretvā,
asmiṃ pathavimaṇḍale;
Mahaddhane mahābhoge,
aḍḍhe ajāyihaṃ kule.

Sabbakāmehi sampanne,
ratanehi ca sattahi;
Buddhā saṅgāhakā loke,
tehi etaṃ sudesitaṃ.

Eso hetu mahantassa,
pathabyo me na vipajjati;
Pahūta­vit­tūpaka­raṇo,
rājā hoti patāpavā.

Iddhimā yasavā hoti,
jambumaṇḍassa issaro;
Ko sutvā nappasīdeyya,
api kaṇhābhijātiyo.

Tasmā hi attakāmena,
mahat­ta­mabhi­kaṅ­khatā;
Saddhammo garukātabbo,
saraṃ buddhā­na­sāsa­nan”ti.

Navamaṃ.