eko dharmo loka utpadyate bahujanāhitāya bahujanaduḥkhāya anarthāyāhitāya duḥkhāya devamanuṣyāṇāṃ yaduta mātsaryaṃ | mātsaryaṃ loka utpadyate bahujanāhitāya bahujanaduḥkhāya anarthāyāhitāya duḥkhāya devamanuṣyāṇāṃ |

eko dharmo loka utpadyate bahujanahitāya bahujanasukhāya lokānukaṃpāyai arthāya hitāya sukhāya devamanuṣyāṇāṃ yaduta vigatamalamātsaryaṃ | vigatamalamātsaryaṃ loka utpadyate bahujanahitāya bahujanasukhāya lokānukaṃpāyai arthāya hitāya sukhāya devamanuṣyāṇāṃ |

dānasūtra

evaṃ hi satvā jānīyur dānasya phalaṃ dānasaṃvibhāgasya ca phalavipākaṃ yathāhaṃ jānāmi dānasya phalaṃ dānasaṃvibhāgasya ca phalavipakām | apīdānīṃ yo ’sau bhavaty apaścimakaḥ kavaṭaś ||kavaḍaś|| carama ālopas tato ’pi nādatvā nāsaṃvibhajya paribhuṃjīran sacel labheran dakṣiṇīyaṃ pratigrāhakaṃ na caiṣām utpanno mātsaryamalaś ca cittaṃ paryādāya tiṣṭhed |

yasmāt tarhi satvā na jānanti dānasya phalaṃ dānasaṃvibhāgasya ca phalavipākaṃ yathāhaṃ jānāmi dānasya phalaṃ dānasaṃvibhāgasya ca phalavipākaṃ, tasmād adatvā asaṃvibhajya paribhuṃjate āgṛhītena cetasā, utpannaṃ caiṣāṃ mātsaryaṃ cittaṃ paryādāya tiṣṭhati |

evaṃ hi satvā jānīyur yathā proktaṃ maharṣiṇā |
vipākaḥ saṃvibhāgasya yathā bhavati mahārthikaḥ ||

nādatvā paribhuṃjīran na syur matsariṇas tathā |
na caiṣām āgrahe cittam utpadyeta kathaṃcana ||

yasmāt tv ete na jānanti bālā mohatamovṛtāḥ |
adatvā bhuṃjate tasmād āgṛhītena cetasā |
utpannaṃ caiṣāṃ mātsaryaṃ cittam ādāya tiṣṭhati || ||

evaṃ hi satvā jānīyur duḥśīlā pāpadharmāṇa ātmano gatiṃ copapattiṃ cābhisaṃparāyaṃ ca yathāhaṃ jānāmi satvānāṃ duḥśīlānāṃ pāpadharmāṇāṃ gatiṃ copapattiṃ cābhisaṃparāyaṃ ca | apīdānīṃ mlāyeyuḥ śuṣyeyur lūtā vā haritā naḍā ām. + + + + + + cchanna |

yasmāt tarhi satvā na jānanti duḥśīlāḥ pāpadharmāṇa ātmano gatiṃ copapattiṃ cābhisaṃparāyaṃ ca ytasmāt kāyena duścaritaṃ caranti vācā manasā duścaritaṃ caranti | te kāyena duścaritaṃ caritvā vācā manasā duścaritaṃ caritvā taddhetus tatpratyayaṃ kāyasya bhedāt paraṃ­maraṇād apāyadurgativinipātaṃ narakeṣūpapadyante ||

evaṃ hi satvā jānīyur yathā proktaṃ maharṣiṇā |
yā gatiḥ pāpakarmāṇāṃ duḥśīlānām itaś cyute ||

mlāyeyur atha śuṣyeyur lūtā vā haritā naḍāḥ |
yasmāt tu na prajānanti bālā mohatamovṛtāḥ ||

tasmāt kāyena vācā ca manasā cāpy asaṃvṛtāḥ |
kurvanti pāpakaṃ karma yad bhavati kaṭukodayaṃ ||

na tat karma kṛtaṃ sādhu kṛtvā yad anutapyate |
rudann aśrumukho yasya vipākaṃ pratisevate ||

tatra karma kṛtaṃ sādhu kṛtvā yan nānutapyate |
yasya pratītaḥ sumanā vipākaṃ pratisevate || ||

evaṃ hi satvā jānīyuḥ śīlavanto guṇavantaḥ peśalāḥ kalyāṇadharmāṇaḥ ātmano gatiṃ copapattiṃ cābhisaṃparāyaṃ ca yathāhaṃ jānāmi satvānāṃ śīlavatāṃ guṇavatāṃ peśalānāṃ kalyāṇadharmāṇāṃ gatiṃ copapattiṃ cābhisaṃparāyaṃ ca |

apīdānīṃ anena pūtikāyena jātīyanto jihrīyanto vitaranto vijugupsamānāḥ śastram apy ādhārayeyur viṣam api bhakṣayeyur rajvāvanaddhā mriyeran prapātād vā prapateyuḥ ||

evaṃ hi satvā jānīyur yathā proktaṃ maharṣiṇā |
yā gatiḥ śīlayuktānāṃ yā gatir dharmajīvinaḥ ||

anena pūtikāyena jātīyantaḥ punaḥpunaḥ |
śastram ādhārayeyus te devalokābhinandinaḥ ||

yo ’sau bhavati strī vā puruṣo vā duḥśīlaḥ pāpadharmāḥ kāyaduścaritena samanvāgato vāṅmanoduścaritena samanvāgatas tasya kāyasya bhedād ayam evaṃrūpo manomayaḥ kāyo ’bhinirvartate tadyathā kṛṣṇasya kutapasya nirbhāsaḥ andhakāratamisrayā vā rātryā yeṣāṃ divyaṃ cakṣuḥ suviśuddhaṃ ta enaṃ paśyanti ||

yo ’sau bhavati strī vā puruṣo vā śīlavān kalyāṇaadharmāḥ kāyaduścaritena samanvāgato vāṅmanahsucaritena samanvāgatas tasya kāyasya bhedād ayam evaṃrūpo manomayaḥ kāyo ’bhinirvartate tadyathā śuklasya paṭasya nirbhāsaḥ jyotsnāyā vā rātryā yeṣāṃ divyaṃ cakṣuḥ suviśuddhaṃ ta enaṃ paśyanti ||

abhijānāmy ahaṃ bhikṣavo dīrgarātrakṛtānāṃ puṇyānāṃ dīrgharātram iṣtaṃ priyaṃ manaāpaṃ vipākaṃ pratyanubhavituṃ |

saptāhaṃ varṣāṇi maitraṃ cittaṃ bhāvayitvā sapta saṃvartavivartakalpān nemaṃ lokam upāgamam |

saṃvartamāne ’haṃ loke ābhāsvare devanikāye upapadye | vivartamāne loke śūnye brāhme vimāne upapadye | tatrāhaṃ bhavāmi brahmā mahābrahmā abhibhūr anabhibhūto ’nyataradaśaśatavaśavartī mahābrahmā teṣāṃ satvānām agra ākhyātaḥ |

ṣaḍviṃśatkṛtvaś cāhaṃ śakro ’bhūvan devānām indro

’nekaśatakṛtvaś ca rājābhūvaṃ cakravartī caturanto vijetā dhārmiko dharmarājaḥ saptaratnasamanvāgataḥ tasya mama imāny evaṃrūpāṇi sapta ratnāni abhūvaṃs tadyathā cakraratnaṃ hastiratnam aśvaratnaṃ maṇiratnaṃ strīratnaṃ gṛhapatiratnaṃ pariṇāyakaratnam eva saptamaṃ pūrṇaṃ ca me ’bhūt sahasraṃ putrāṇāṃ śūrāṇāṃ vīrāṇāṃ varāṅgarūpiṇāṃ parasainyapramardakānāṃ | so ’ham imām eva samudraparyantāṃ mahāpṛthivīm akhilām akaṇṭakām anutpīḍām adaṇḍenāśastreṇa dharmeṇa samenābhinirjityādhyavasitavān |

tasya mamaitad abhavat | kasyaitat karmaṇaḥ phalaṃ kasyaiṣa karmaṇaḥ phalavipāko yenāsmy etarhy evaṃ maharddhika evaṃ mahānubhāva iti |

tasya mamaitad abhavat | trayāṇām etat karmaṇāṃ phalaṃ trayāṇām eṣa karmaṇāṃ phalavipāko yenāsmy etarhy evaṃmaharddhika evaṃ mahānubhāvaḥ |

katameṣāṃ trayāṇāṃ | yaduta dānasya damasya saṃyamasya ||

vipākaṃ paśya puṇyānāṃ kuśalānāṃ sukhaiṣiṇāṃ |
maitraṃ cittaṃ bhāvayitvā sapta varṣāṇi bhikṣavaḥ || 1

sapta saṃvartavaivartān nemaṃ lokam upāgamam | ||upagamat
saṃvartamāne loke ’smin bhavāmy ābhāsvaropagaḥ || 2

vivartamāne ca bhavāmy eṣa brahmopago hy ahaṃ |
saptakṛtvo mahābrahmā vaśavarty abhavat purā || 3

ṣaṭtriṃśadguṇakṛtvaś ca devarājyam akārayat |
anekaśatakṛtvaś ca rājābhūvan pratāpavān || 4

mūrdhnābhiṣiktaḥ kṣatriyo jāmbūṣaṇḍeśvaras tadā |
adaṇḍenā­śastreṇa vijitya pṛthivīm imāṃ || 5

asāhasena dharmeṇa samyag evānuśiṣṭavān |
dharmacakraṃ vartayitvā asmin pṛthivīmaṇḍale || 6

mahādhano mahābhoge jāto ’haṃ tādṛśe kule |
sarvadravyopasaṃpanno ratnaiḥ saptabhir eva ca || 7

prabhūtavittopakaraṇo rājābhūvan pratāpavān |
eṣa hetur hi māhātmye prabhūtvaṃ yena jāyate || 8

buddhāḥ saṃgrāhakā loke etat teṣāṃ sudeśitam |
kaḥ śrutvā na prasīdeta api kṛṣṇābhijātikaḥ || 9

tasmād ihātmakāmena māhātmyam abhikāṅkṣatā |
saddharmo gurukartavyaḥ smaratā buddhaśāsanam || 10 ||

+ + + … + + +