“Pure tuvaṃ sīlavataṃ sakāse,
Okkantikaṃ kīḷasi assamamhi;
Karohare makkaṭiyāni makkaṭa,
Na taṃ mayaṃ sīlavataṃ ramāma”.

“Sutā hi mayhaṃ paramā visuddhi,
Komāraputtassa bahussutassa;
Mā dāni maṃ maññi tuvaṃ yathā pure,
Jhānānuyutto viharāmi āvuso”.

“Sacepi selasmi vapeyya bījaṃ,
Devo ca vasse na hi taṃ virūḷhe;
Sutā hi te sā paramā visuddhi,
Ārā tuvaṃ makkaṭa jhānabhūmiyā”ti.

Komāra­putta­jātakaṃ navamaṃ.