kiyatā bhikṣavo bhikṣuḥ parimīmāṃsamānaḥ parimīmāṃseta samyagduḥkhakṣayāya duḥkhasyāntakriyāyai |

bhagavanmūlakā bhadanta dharmāḥ pūrvavad yāvad bhāṣiṣye |

bhikṣuḥ parimīmāṃsamānaḥ parimīmāṃsate samyagduḥkhakṣayāya duḥkhasyāntakriyāyai | atra cet satvānāṃ duḥkhaṃ utpadyamānam utpadyeta bahunānāprakāram | idaṃ duḥkhaṃ kinnidānaṃ kiṃsamudayaṃ kiṃjātīyaṃ kiṃprabhavam |

sa evaṃ parimīmāṃsamāno jānāti | idaṃ duḥkham upadhinidānam upadhisamudayam upadhijātīyam upadhiprabhavam | upadhiś cet sarveṇa sarvaṃ sarvathā sarvam apariśeṣaṃ nirudhyetāpariśeṣam adhyastaṃ parikṣayaṃ paryādānaṃ gacched duḥkham apy asya nirudhyeta |

sa yā ca duḥkhanirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyagduḥkhakṣayāya duḥkhasyāntakriyāyai pratipanno yad utopadhinirodhāya |

punar aparaṃ bhikṣuḥ parimīmāṃsa­mānaḥ parimīmāṃ­sate samyagduḥkhakṣayāya duḥkhasyāntakriyāyai | upadhiḥ punaḥ kinnidānaḥ kiṃsamudayaḥ kiṃjātīyaḥ kiṃprabhavaḥ |

sa evaṃ parimīmāṃ­samāno jānāti | upadhis tṛṣṇānidānas tṛṣṇāsamudayas tṛṣṇājātīyas tṛṣṇāprabhavaḥ | tṛṣṇā cet sarveṇa sarvaṃ sarvathā sarvam apariśeṣaṃ nirudhyetāpariśeṣam adhyastaṃ parikṣayaṃ paryādānaṃ gacched upadhir apy asya nirudhyeta |

sa yā copadhinirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyagduḥkhakṣayāya duḥkhas­yāntakriyāyai pratipanno yad uta tṛṣṇānirodhāya |

punar aparaṃ bhikṣuḥ parimīmāṃsamānaḥ parimīmāṃsate samyagduḥkhakṣayāya duḥkhasyāntakriyāyai | tṛṣṇā punaḥ kinnidānā kiṃsamudayā kiṃjātīyā kiṃ­prabhavā |

sa evaṃ parimīmāṃsamāno jānāti | tṛṣṇā vedanānidānā vedanā­samudayā vedanājātīyā vedanāprabhavā | vedanā cet sarveṇa sarvaṃ sarvathā sarvam apariśeṣaṃ nirudhyetāpariśeṣam adhyastaṃ parikṣayaṃ paryādānaṃ gacchet tṛṣṇāpy asya nirudhyeta |

sa yā ca tṛṣṇānirodhagāminī pratipat tāṃ yathā­bhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyagduḥkhakṣayāya duḥkhasyāntakriyāyai pratipanno yad uta vedanānirodhāya |

punar aparaṃ bhikṣuḥ parimīmāṃsamānaḥ parimīmāṃsate samyagduḥkhakṣayāya duḥkhasyāntakriyāyai | vedanā punaḥ kinnidānā kiṃsamudayā kiṃjātīyā kiṃ­prabhavā |

sa evaṃ parimīmāṃ­samāno jānāti | vedanā sparśanidānā sparśasamudayā sparśajātīyā sparśaprabhavā | sparśaś cet sarveṇa sarvaṃ sarvathā sarvam apariśeṣaṃ nirudhyetā­pari­śeṣam adhyastaṃ parikṣayaṃ paryādānaṃ gacched vedanāpy asya nirudhyeta |

sa yā ca vedanānirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyag­duḥkha­kṣayāya duḥkhasyāntakriyāyai pratipanno yad uta sparśanirodhāya |

punar aparaṃ bhikṣuḥ pari­mīmāṃ­sa­mānaḥ parimīmāṃ­sate samyagduḥkhakṣayāya duḥkhasyāntakriyāyai | sparśaḥ kinnidānaḥ kiṃsamudayaḥ kiṃjātīyaḥ kiṃprabhavaḥ |

sa evaṃ parimīmāṃ­samāno jānāti | sparśaḥ ṣaḍāyatananidānaḥ ṣaḍāyatanasamudayaḥ ṣaḍāyatanajātīyaḥ ṣaḍāyatanaprabhavaḥ | ṣaḍāyatanaṃ cet sarveṇa sarvaṃ sarvathā sarvam apariśeṣaṃ nirudhyetāpari­śeṣam adhyastaṃ parikṣayaṃ paryādānaṃ gacchet sparśo ’py asya nirudhyeta |

sa yā ca sparśanirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyag­duḥkha­kṣayāya duḥkhasyāntakriyāyai pratipanno yad uta ṣaḍāyata­nanirodhāya |

punar aparaṃ bhikṣuḥ parimīmāṃ­samānaḥ parimīmāṃsate samyagduḥkhakṣayāya duḥkhasyāntakriyāyai | ṣaḍāyata­naṃ punaḥ kinnidānaṃ kiṃsamudayaṃ kiṃ­jātī­yaṃ kiṃprabhavam |

sa evaṃ pari­mīmāṃsamāno jānāti | ṣaḍāyatanaṃ nāmarūpanidānaṃ nāmarūpasamudayaṃ nāmarūpajātīyaṃ nāmarūpaprabhavam | nāmarūpaṃ cet sarveṇa sarvaṃ sarvathā sarvam apariśeṣaṃ nirudhyetāpariśeṣam adhyastaṃ parikṣayaṃ paryādānaṃ gacchet ṣaḍāyatanam apy asya nirudhyeta |

sa yā ca ṣaḍā­yata­nanirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyagduḥkhakṣayāya duḥkhasyāntakriyāyai pratipanno yad uta nāmarūpanirodhāya |

punar aparaṃ bhikṣuḥ parimīmāṃsamānaḥ parimīmāṃsate samyagduḥkhakṣayāya duḥkhasyāntakriyāyai | nāmarūpaṃ punaḥ kinnidānaṃ kiṃsamudayaṃ kiṃjātīyaṃ kiṃprabhavam |

sa evaṃ parimīmāṃsamāno jānāti | nāmarūpaṃ vijñānanidānaṃ vijñānasamudayaṃ vijñānajātīyaṃ vijñānaprabhavam | vijñānaṃ cet sarveṇa sarvaṃ sarvathā sarvam apariśeṣaṃ nirudhyetāpariśeṣam adhyastaṃ parikṣayaṃ paryādānaṃ gacchen nāmarūpam apy asya nirudhyeta |

sa yā ca nāmarūpanirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyagduḥkhakṣayāya duḥkhasyāntakriyāyai pratipanno yad uta vijñānanirodhāya |

punar aparaṃ bhikṣuḥ parimīmāṃsamānaḥ parimīmāṃsate samyagduḥkhakṣayāya duḥkhasyāntakriyāyai | vijñānaṃ punaḥ kinnidānaṃ kiṃjātīyaṃ kiṃprabhavaṃ kiṃsamudayam

sa evaṃ parimīmāṃsamāno jānāti | vijñānaṃ saṃskārasamudayaṃ saṃskārajātīyaṃ saṃskāraprabhavam | sa puṇyān abhisaṃskārān abhisaṃskaroti | puṇyopagam apy asya bhavati vijñānam | apuṇyān abhisaṃskārān abhisaṃskaroti | apuṇyopagam apy asya bhavati vijñānam | ānijyān abhisaṃskārān abhisaṃskaroti | ānijyopagam apy asya bhavati vijñānam | tad anenaiva paryāyeṇa veditavyaṃ yad vijñānam api saṃ­skāranidānaṃ saṃskārasamudayaṃ saṃskārajātīyaṃ saṃskāraprabhavam | saṃskārāś cet sarveṇa sarvaṃ sarvathā sarvam apariśeṣaṃ nirudhyetā­pari­śeṣam adhyastaṃ parikṣayaṃ paryādānaṃ gacched vijñānam apy asya nirudhyeta |

sa yā ca vijñānanirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyag­duḥkhakṣayāya duḥkhasyāntakriyāyai pratipanno yad uta saṃskāranirodhāya |

punar aparaṃ bhikṣuḥ parimīmāṃsamānaḥ parimīmāṃsate samyagduḥkhakṣayāya duḥkhasyāntakriyāyai | saṃskārāḥ punaḥ kinnidānāḥ kiṃsamudayāḥ kiṃjātīyāḥ kiṃprabhavāḥ |

sa evaṃ parimīmāṃsamāno jānāti | saṃskārā avidyānidānā avidyāsamudayā avidyā­jātiyā avidyāprabhavāḥ | sa puṇyān abhisaṃskārān abhisaṃskaroty avidyāpratyayān | apuṇyān apy ānijyān apy abhisaṃskārān abhisaṃskaroty avidyāpratyayān | tad anenaiva paryāyeṇa veditavyaṃ yat saṃskārā apy avidyānidānā avidyāsamudayā avidyājātīyā avidyāprabhavāḥ | avidyā cet sarveṇa sarvaṃ sarvathā sarvam apariśeṣaṃ nirudhyetāpāriśeṣam adhyastaṃ parikṣayaṃ paryādānaṃ gacchet saṃskārā apy asya nirudhyeran |

sa yā ca saṃskāranirodhagāminī pratipat tāṃ yathābhūtaṃ prajānāti | tathā pratipannaś ca bhavaty anudharmacārī | ayam ucyate bhikṣuḥ samyagduḥkhakṣayāya duḥkhasyāntakriyāyai pratipanno yad uta avidyānirodhāya |

kiṃ manyadhve bhikṣavo yasya bhikṣor avidyā viraktā bhavati vidyotpannā api tu sa punar api puṇyān abhisaṃskārān abhisaṃs­kuryād avidyāpratyayān | apuṇyān apy ānijyān abhisaṃ­skārān abhisaṃskuryād avidyāpratyayān |

no bhadanta | tat kasmād dhetoḥ | yataś ca śrutavata āryaśrāvakasyāvidyā viraktā vidyotpannā tasyāvidyānirodhāt saṃskāranirodhaḥ | saṃskāranirodhād vijñānanirodhaḥ pūrvavad yāvan nirodho bhavatīti |

sādhu sādhu bhikṣavaḥ | ahaṃ caivaṃ vadāmi yūyaṃ caivaṃ prajānīdhvam | yathā teṣāṃ teṣāṃ dharmāṇām utpādāt te te dharmā utpadyante | teṣāṃ teṣāṃ dharmāṇāṃ nirodhāt te te dharmā nirudhyante vyupaśamanti śītībhavanty astaṃgacchanti |

yataś ca śrutavata āryaśrāvakasyāvidyā viraktā bhavati vidyotpannā | sa kāyaparyantikāṃ vedanāṃ vedayānaḥ kāyaparyantikāṃ vedanāṃ vedayāmīti yathābhūtaṃ prajānāti | jīvitaparyan­tikāṃ vedanāṃ vedayāno jīvita­paryan­tikāṃ vedanāṃ vedayāmīti yathābhūtaṃ prajānāti | bhedāc ca kāyasyordhvaṃ jīvitaparyādānād ihaivāsya sarvāṇi vedayitavyāny apariśeṣaṃ nirudhyante | apariśeṣam adhyastaṃ parikṣayaṃ paryādānaṃ gacchanti |

tad yathā balavān puruṣaḥ soṣmāt kumbhakārapākāt soṣmaṃ kumbhaṃ gṛhītvā same pṛthivīpradeśe upanikṣipeta tasya ya uṣmā so ’ntarhīyeta śītībhaveyuḥ kapālāni | evam eva yataś ca bhikṣor avidyā viraktā bhavati vidyotpannā sa kāyaparyantikāṃ vedanāṃ vedayānaḥ kāyaparyantikāṃ vedanāṃ vedayāmīti yathā­bhūtaṃ prajānāti pūrvavad yāvat parikṣayaṃ paryādānaṃ gacchanti ||