“Mattā vaṇṇena rūpena,
sobhaggena yasena ca;
Yobbanena cupatthaddhā,
aññāsa­mati­maññi­haṃ.

Vibhūsetvā imaṃ kāyaṃ,
sucittaṃ bālalāpanaṃ;
Aṭṭhāsiṃ vesidvāramhi,
luddo pāsamivoḍḍiya.

Piḷandhanaṃ vidaṃsentī,
guyhaṃ pakāsikaṃ bahuṃ;
Akāsiṃ vividhaṃ māyaṃ,
ujjagghantī bahuṃ janaṃ.

Sājja piṇḍaṃ caritvāna,
muṇḍā saṅghāṭipārutā;
Nisinnā rukkhamūlamhi,
avitakkassa lābhinī.

Sabbe yogā samucchinnā,
ye dibbā ye ca mānusā;
Khepetvā āsave sabbe,
sītibhūtāmhi nibbutā”ti.

… Vimalā purāṇagaṇikā therī ….