rājagṛhe nidānam |

tena khalu samayenāyuṣmāñ chāriputra āyuṣmāṃś ca mahākoṣṭhilo rājagṛhe viharato gṛdhrakūṭe parvate |

athāyuṣmān mahākoṣṭhilaḥ sāyāhne pratisaṃlayanād vyutthāya yenāyuṣmāñ chāriputras tenopajagāma | upetyāyuṣmatā śāriputreṇa sārdhaṃ saṃmukhaṃ sammodanīṃ saṃraṃjanīṃ kathāṃ vividhām upasaṃhṛtyaikānte nyaṣīdat | ekāntaniṣaṇṇa āyuṣmān mahākoṣṭhila āyuṣmantaṃ śāriputram idam avocat |

pṛcchāma āyuṣmañ chāriputra kañcid eva pradeśam | saced avakāśaṃ kuryāḥ praśnasya vyākaraṇāya |

pṛcchāyuṣman mahākosṭhila | śrutvā te vedayiṣyāmi |

kiyatāyuṣmañ chāriputra āryaśrāvako ’smin dharmavinaye dṛṣṭisaṃpannaś ca bhavati | ṛjvyā ca dṛṣṭyā samanvāgato bhavati | buddhe cāvetyaprasā­dena samanvāgato bhavati | āgata imaṃ saddharmam upagata imaṃ saddharmam avaiti saddharmam ity ucyate |

yataś cāyaṃ mahākoṣṭhila āryaśrāvako ’kuśalaṃ yathābhūtaṃ prajānāti | akuśalamūlaṃ yathābhūtaṃ prajānāti | kuśalaṃ yathābhūtaṃ prajānāti | kuśalamūlaṃ yathābhūtaṃ prajānāti |

kim akuśalaṃ yathābhūtaṃ prajānāti | akuśalaṃ kāyakarma vākkarma manaḥkarma | idam akuśalam | evam akuśalaṃ yathābhūtaṃ prajānāti |

kim akuśalamūlaṃ yathābhūtaṃ prajānāti | trīṇy akuśalamūlāni | lobho ’kuśalamūlam | dveṣo moho ’kuśalamūlam | idam akuśalamūlam | evam akuśalamūlaṃ yathābhūtaṃ prajānāti |

kuśalaṃ kāyakarma vākkarma manaḥkarma | idaṃ kuśalam | evaṃ kuśalaṃ yathābhūtaṃ prajānāti |

kiṃ kuśalamūlaṃ yathābhūtaṃ prajānāti | trīṇi kuśala­mūlāni | alobhaḥ kuśalamūlam | adveṣo ’mohaḥ kuśalamūlam | idaṃ kuśalamūlam | evaṃ kuśalamūlaṃ yathābhūtaṃ prajānāti |

yataś cāyuṣman mahākoṣṭhila āryāśrāvaka evam akuśalaṃ yathābhūtaṃ prajānāti | akuśalamūlaṃ yathābhūtaṃ prajānāti | kuśalaṃ yathābhūtaṃ prajānāti | kuśalamūlaṃ yathābhūtaṃ prajānāti |

iyatāryaśrāvako ’smin dharmavinaye dṛṣṭisaṃpannaś ca bhavati | ṛjvyā ca dṛṣṭyā samanvāgato bhavati | buddhe cāvetyaprasādena samanvāgato bhavati | āgata imaṃ saddharmam upagata imaṃ sad­dharmam avaiti saddharmam ity ucyate |

kin nv āyuṣmañ chāriputra eṣa eva paryāyaḥ | aho svid anyo ’pi | syād āyuṣman mahā­koṣṭhila anyo ’pi |

yataś cāryaśrāvaka āhārān yathābhūtaṃ prajānāti | āhārasamudayam āhāranirodham āhāranirodhagāminīṃ pratipadaṃ yathābhūtaṃ prajānāti |

kim āhārān yathābhūtaṃ prajānāti | catvāra āhārāḥ | kabaḍiṃkāra āhāra audārikaḥ sūkṣmaś ca | sparśo dvitīyaḥ | manaḥsañcetanā tṛtīyaḥ | vijñānaṃ caturthaḥ | ima āhārāḥ | evam āhārān yathābhūtaṃ prajānāti |

kim āhārasamudayaṃ yathābhūtaṃ prajānāti | tṛṣṇā paunarbhavikī nandirāgasahagatā tatratatrābhinandinī | ayam āhārasamudayaḥ | evam āhārasamudayaṃ yathābhūtaṃ prajānāti |

kim āhāranirodhaṃ yathābhūtaṃ prajānāti | yad asyā eva tṛṣṇāyāḥ paunarbhavikyā nandirāgasahagatāyās tatratatrābhinandinyā yad aśeṣaṃ prāhāṇaṃ pratiniḥsargo vyantibhāvaḥ kṣayo virāgo nirodho vyupaśamo ’staṃgamaḥ | ayam āhāranirodhaḥ | evam āhāranirodhaṃ yathābhūtaṃ prajānāti |

kim āhāranirodhagāminīṃ prati­padaṃ yathābhūtaṃ prajānāti | yadutāryāṣṭāṅgo mārgaḥ | tadyathā samyagdṛṣṭiḥ samyaksaṃkalpaḥ samyagvāk samyak­karmāntaḥ samyagājīvaḥ samyagvyāyāmaḥ samyaksmṛtiḥ samyaksamādhiḥ | eṣa mārgaḥ | iyam āhāranirodhagāminī pratipat | evam āhāranirodhagāminīṃ pratipadaṃ yathābhūtaṃ prajānāti |

yataś cāryaśrāvaka evam āhārān yathābhūtaṃ prajānāti | āhārasamudayam āhāranirodham āhāranirodhagāminīṃ pratipadaṃ yathābhūtaṃ prajānāti |

iyatāryaśrāvako ’smin dharmavinaye dṛṣṭisampannaś ca bhavati pūrvavat |

kin nv āyuṣmañ chāriputra eṣa eva paryāyaḥ | aho svid anyo’pi | syād āyuṣman mahākoṣṭhila anyo’pi |

yataś cāryaśrāvaka āsravān yathābhūtaṃ prajānāti | āsravasamudayam āsravanirodham āsravanirodhagāminīṃ pratipadaṃ yathābhūtaṃ prajānāti |

kim āsravān yathābhūtaṃ prajānāti | traya āsravāḥ | kāmāsravo bhavāsravo ’vidyāsravaḥ | ima āsravāḥ | evam āsravān yathābhūtaṃ prajānāti |

kim āsravasamudayaṃ yathābhūtaṃ prajānāti | avidyāsamudayād āsravasamudayaḥ | ayam āsravasamudayaḥ | evam āsravasamudayaṃ yathābhūtaṃ prajānāti |

kim āsravanirodhaṃ yathābhūtaṃ prajānāti | avidyānirodhād āsravanirodhaḥ | evam āsravanirodhaṃ yathābhūtaṃ prajānāti |

kim āsravanirodhagāminīṃ pratipadaṃ yathābhūtaṃ prajānāti | āryāṣṭāṅgo mārgaḥ pūrvavat |

yataś cāryaśrāvaka evam āsravān yathābhūtaṃ prajānāti | āsravasamudayam āsravanirodham āsravanirodhagāminīṃ pratipadaṃ yathābhūtaṃ prajānāti |

iyatāryaśrāvako ’smin dharmavinaye dṛṣṭisampannaś ca bhavati pūrvavat |

kin nv āyuṣmañ chāriputra eṣa eva paryāyaḥ | aho svid anyo’pi | syād āyuṣman mahākoṣṭhila anyo’pi |

yataś cāryaśrāvako duḥkhaṃ yathābhūtaṃ prajānāti | duḥkhasamudayaṃ duḥkhanirodhaṃ duḥkhanirodhagāminīṃ pratipadaṃ yathābhūtaṃ prajānāti |

kiṃ duḥkhaṃ yathābhūtaṃ prajānāti | jātir duḥkham | jarā duḥkham | vyādhir duḥkham | maraṇaṃ duḥkham | priyaviprayogo duḥkham | apriyasaṃ­prayogo duḥkham | yad apīcchate paryeṣamāṇo na labhate tad api duḥkham | saṃkṣiptena pañcopādānaskandhā duḥkham | idaṃ duḥkham | evaṃ duḥkhaṃ yathābhūtaṃ prajānāti |

kiṃ duḥkhasamudayaṃ yathā­bhūtaṃ prajānāti | tṛṣṇā paunarbhavikī pūrvavat | ayaṃ duḥkhasamudayaḥ | evaṃ duḥkhasamudayaṃ yathābhūtaṃ prajānāti |

kiṃ duḥkhanirodhaṃ yathābhūtaṃ prajānāti | yad asyā eva tṛṣṇāyāḥ paunarbhavikyāḥ pūrvavat | ayaṃ duḥkhanirodhaḥ | evaṃ duḥkhanirodhaṃ yathābhūtaṃ prajānāti |

kiṃ duḥkhanirodhagāminīṃ pratipadaṃ yathābhūtaṃ prajānāti | āryāṣṭāṅgomārgaḥ pūrvavat | iyaṃ duḥkhanirodhagāminī pratipat | evaṃ duḥkhanirodhagāminīṃ pratipadaṃ yathābhūtaṃ prajānāti |

iyatāryaśrāvako ’smin dharmavinaye dṛṣṭisampannaś ca bhavati pūrvavat |

kin nv āyuṣmañ chāriputra eṣa eva paryāyaḥ | aho svid anyo ’pi | syād āyuṣman mahākoṣṭhila anyo ’pi |

yataś cāryaśrāvako jarāmaraṇaṃ yathābhūtaṃ prajānāti | jarāmaraṇasamudayaṃ jarāmaraṇanirodhaṃ jarāmaraṇanirodhagāminīṃ pratipadaṃ yathābhūtaṃ prajānāti |

kiṃ jarāmaraṇaṃ yathābhūtaṃ prajānāti | pūrvavad yathā ādisūtre |

kiṃ jarāmaraṇasamudayaṃ yathābhūtaṃ prajānāti | jātisamudayāj jarāmaraṇasamudayaḥ |

evaṃ jātinirodhāj jarāmaraṇanirodhaḥ |

āryāṣṭāṅgo mārgaḥ pūrvavat |

yataś cāryaśrāvaka evaṃ jarāmaraṇaṃ yathābhūtaṃ prajānāti | jarāmaraṇasamudayaṃ jarāmaraṇanirodhaṃ jarāmaraṇanirodhagāminīṃ pratipadaṃ yathābhūtaṃ prajānāti |

iyatāryaśrāvako ’smin dharmavinaye dṛṣṭisampannaś ca bhavati pūrvavat |

evaṃ jātir bhava upādānaṃ tṛṣṇā vedanā sparśaḥ ṣadāyatanaṃ nāmarūpaṃ vijñānaṃ saṃskārāḥ |

yataś cāryaśrāvakaḥ saṃskārān yathābhūtaṃ prajānāti | saṃ­skārasamudayaṃ saṃskāranirodhaṃ saṃskāranirodhagāminīṃ pratipadaṃ yathā­bhūtaṃ prajānāti |

kiṃ saṃskārān yathābhūtaṃ prajānāti | trayaḥ saṃskārāḥ | kāyasaṃskāro vāksaṃskāro manaḥsaṃskāraḥ |

kiṃ saṃskārasamudayaṃ yathābhūtaṃ prajānāti | avidyāyāḥ samudayāt saṃskārasamudayaḥ | ayaṃ saṃskārasamudayaḥ | evaṃ saṃskārasamudayaṃ yathābhūtaṃ prajānāti |

kiṃ saṃskāranirodhaṃ yathābhūtaṃ prajānāti / avidyāyā nirodhāt saṃskāranirodhaḥ | ayaṃ saṃskāranirodhaḥ |

kiṃ saṃskāranirodhagāminīṃ pratipadaṃ yathābhūtaṃ prajānāti | āryāṣṭāṅgo mārgaḥ pūrvavat |

yataś cāyuṣman mahākoṣṭhila āryaśrāvaka evaṃ saṃskārān yathābhūtaṃ prajānāti saṃskārasamudayaṃ saṃskāranirodhaṃ saṃskāranirodhagāminīṃ pratipadaṃ yathābhūtaṃ prajānāti |

iyatāryaśrāvako ’smin dharmavinaye dṛṣṭisaṃpannaś ca bhavati | ṛjvyā ca dṛṣṭyā samanvāgato bhavati | buddhe cāvetyaprasādena samanvāgato bhavati | āgata imaṃ saddharmam upagata imaṃ saddharmam avaiti saddharmam ity ucyate |

kin nv āyuṣmañ chāriputra eṣa eva paryāyaḥ | aho svid anyo ’pi |

atisarasy atisarasy āyuṣman mahā­koṣṭhila | na śakṣyase praśnān āparyantam udgṛhītuṃ yataś caryaśrāvakasyāvidyā viraktā bhavati vidyotpannā |

atha kin nv asyottare karaṇīyam iti tau satpuruṣāv anyonyabhāṣitam abhinandyānumodya utthāyāsanāt prakrāntau ||