“Yassa sabrahmacārīsu,
gāravo nūpalabbhati;
Parihāyati saddhammā,
maccho appodake yathā.

Yassa sabrahmacārīsu,
gāravo nūpalabbhati;
Na virūhati saddhamme,
khette bījaṃva pūtikaṃ.

Yassa sabrahmacārīsu,
gāravo nūpalabbhati;
Ārakā hoti nibbānā,
dhammarājassa sāsane.

Yassa sabrahmacārīsu,
gāravo upalabbhati;
Na vihāyati saddhammā,
maccho bavhodake yathā.

Yassa sabrahmacārīsu,
gāravo upalabbhati;
So virūhati saddhamme,
khette bījaṃva bhaddakaṃ.

Yassa sabrahmacārīsu,
gāravo upalabbhati;
Santike hoti nibbānaṃ,
dhammarājassa sāsane”ti.

… Mahānāgo thero ….