“Nagare haṃsavatiyā,
āsiṃ dovāriko ahaṃ;
Akkhobhaṃ amitaṃ bhogaṃ,
ghare sannicitaṃ mama.

Rahogato nisīditvā,
pahaṃsitvāna mānasaṃ;
Nisajja pāsādavare,
evaṃ cintesahaṃ tadā.

1.1. Cintanākāra

‘Bahū medhigatā bhogā,
phītaṃ antepuraṃ mama;
Rājāpi sannimantesi,
ānando pathavissaro.

Ayañca buddho uppanno,
adhic­cup­pat­tiko muni;
Saṃvijjanti ca me bhogā,
dānaṃ dassāmi satthuno.

Padumena rājaputtena,
dinnaṃ dānavaraṃ jine;
Hatthināge ca pallaṅke,
apas­senañ­ca­nappa­kaṃ.

Ahampi dānaṃ dassāmi,
saṃghe gaṇavaruttame;
Adinna­pubba­maññe­saṃ,
bhavissaṃ ādikammiko.

Cintetvāhaṃ bahuvidhaṃ,
yāge yassa sukhaṃphalaṃ;
Parik­khā­ra­dāna­maddak­khiṃ,
mama saṅkap­pa­pūra­ṇaṃ.

Parikkhārāni dassāmi,
saṃghe gaṇavaruttame;
Adinna­pubba­maññe­saṃ,
bhavissaṃ ādikammiko’.

1.2. Dānavat­thu­sam­pādana

Naḷakāre upāgamma,
chattaṃ kāresi tāvade;
Chatta­sata­sahas­sāni,
ekato sannipātayiṃ.

Dussa­sata­sahas­sāni,
ekato sannipātayiṃ;
Patta­sata­sahas­sāni,
ekato sannipātayiṃ.

Vāsiyo satthake cāpi,
sūciyo nakhachedane;
Heṭṭhāchatte ṭhapāpesiṃ,
kāretvā tadanucchave.

Vidhūpane tālavaṇṭe,
morahatthe ca cāmare;
Parissāvane teladhāre,
kārayiṃ tadanucchave.

Sūcighare aṃsabaddhe,
athopi kāyabandhane;
Ādhārake ca sukate,
kārayiṃ tadanucchave.

Pari­bhoga­bhājane ca,
athopi lohathālake;
Bhesajje pūrayitvāna,
heṭṭhāchatte ṭhapesahaṃ.

Vacaṃ usīraṃ laṭṭhimadhuṃ,
pipphalī maricāni ca;
Harītakiṃ siṅgīveraṃ,
sabbaṃ pūresi bhājane.

Upāhanā pādukāyo,
atho udakapuñchane;
Kattaradaṇḍe sukate,
kārayiṃ tadanucchave.

Osadhañ­jananāḷī ca,
salākā dhammakuttarā;
Kuñcikā pañcavaṇṇehi,
sibbite kuñcikāghare.

Āyoge dhūmanette ca,
athopi dīpadhārake;
Tumbake ca karaṇḍe ca,
kārayiṃ tadanucchave.

Saṇḍāse pipphale ceva,
athopi malahārake;
Bhesaj­ja­thavike ceva,
kārayiṃ tadanucchave.

Āsandiyo pīṭhake ca,
pallaṅke caturomaye;
Tadanucchave kārayitvā,
heṭṭhāchatte ṭhapesahaṃ.

Uṇṇābhisī tūlabhisī,
athopi pīṭhikābhisī;
Bimbohane ca sukate,
kārayiṃ tadanucchave.

Kuruvinde madhusitthe,
telaṃ hatthap­patāpa­kaṃ;
Sipāṭiphalake sucī,
mañcaṃ attharaṇena ca.

Senāsane pādapuñche,
saya­nāsa­na­daṇḍake;
Dantapoṇe ca āṭalī,
sīsālepa­na­gandhake.

Araṇī phalapīṭhe ca,
pat­ta­pidhā­na­thālake;
Udakassa kaṭacchū ca,
cuṇṇakaṃ rajanambaṇaṃ.

Sammajjanaṃ udapattaṃ,
tathā vassikasāṭikaṃ;
Nisīdanaṃ kaṇḍucchādi,
atha antaravāsakaṃ.

Uttarā­saṅga­saṅghāṭī,
natthukaṃ mukhasodhanaṃ;
Biḷaṅgaloṇaṃ pahūtañca,
madhuñca dadhipānakaṃ.

Dhūpaṃ sitthaṃ pilotiñca,
mukha­puñcha­na­sutta­kaṃ;
Dātabbaṃ nāma yaṃ atthi,
yañca kappati satthuno.

Sabbametaṃ samānetvā,
ānandaṃ upasaṅkamiṃ;
Upasaṅkamma rājānaṃ,
janetāraṃ mahesino;
Sirasā abhivādetvā,
idaṃ vacanamabraviṃ.

1.3. Dānokāsayācanā

‘Ekato jātasaṃvaddhā,
ubhinnaṃ ekato manaṃ;
Sādhāraṇā sukhadukkhe,
ubho ca anuvattakā.

Atthi cetasikaṃ dukkhaṃ,
tavādheyyaṃ arindama;
Yadi sakkosi taṃ dukkhaṃ,
vinodeyyāsi khattiya’.

‘Tava dukkhaṃ mama dukkhaṃ,
Ubhinnaṃ ekato mano;
Niṭṭhitanti vijānāhi,
Mamādheyyaṃ sace tuvaṃ’.

‘Jānāhi kho mahārāja,
dukkhaṃ me dubbinodayaṃ;
Pahu samāno gajjasu,
ekaṃ te duccajaṃ varaṃ.

Yāvatā vijite atthi,
yāvatā mama jīvitaṃ;
Etehi yadi te attho,
dassāmi avikampito.

Gajjitaṃ kho tayā deva,
micchā taṃ bahu gajjitaṃ;
Jānissāmi tuvaṃ ajja,
sabbadhamme patiṭṭhitaṃ’.

‘Atibāḷhaṃ nipīḷesi,
dadamānassa me sato;
Kiṃ te me pīḷitenattho,
patthitaṃ te kathehi me’.

‘Icchāmahaṃ mahārāja,
buddhaseṭṭhaṃ anuttaraṃ;
Bhojayissāmi sambuddhaṃ,
vajjaṃ me māhu jīvitaṃ’.

‘Aññaṃ tehaṃ varaṃ dammi,
mā yācittho tathāgataṃ;
Adeyyo kassaci buddho,
maṇi jotiraso yathā’.

‘Nanu te gajjitaṃ deva,
yāva jīvitamattano;
Jīvitaṃ dadamānena,
yuttaṃ dātuṃ tathāgataṃ’.

‘Ṭhapanīyo mahāvīro,
adeyyo kassaci jino;
Na me paṭissuto buddho,
varassu amitaṃ dhanaṃ’.

‘Vinicchayaṃ pāpuṇāma,
pucchissāma vinicchaye;
Yathāsaṇṭhaṃ kathessanti,
paṭipucchāma taṃ tathā’.

Rañño hatthe gahetvāna,
agamāsiṃ vinicchayaṃ;
Purato akkhadassānaṃ,
idaṃ vacanamabraviṃ.

‘Suṇantu me akkhadassā,
rājā varamadāsi me;
Na kiñci ṭhapayitvāna,
jīvitampi pavārayi.

Tassa me varadinnassa,
buddhaseṭṭhaṃ variṃ ahaṃ;
Sudinno hoti me buddho,
chindatha saṃsayaṃ mama’.

‘Sossāma tava vacanaṃ,
bhūmipālassa rājino;
Ubhinnaṃ vacanaṃ sutvā,
chindis­sā­mettha saṃsayaṃ.

Sabbaṃ deva tayā dinnaṃ,
imassa sabbagāhikaṃ;
Na kiñci ṭhapayitvāna,
jīvitampi pavārayi’.

‘Kicchappattova hutvāna,
yācī varamanuttaraṃ;
Imaṃ sudukkhitaṃ ñatvā,
adāsiṃ sabbagāhikaṃ’.

‘Parājayo tuvaṃ deva,
assa deyyo tathāgato;
Ubhinnaṃ saṃsayo chinno,
yathāsaṇṭhamhi tiṭṭhatha’.

Rājā tattheva ṭhatvāna,
akkha­das­seta­dab­ravi;
‘Sammā mayhampi deyyātha,
puna buddhaṃ labhāmahaṃ’.

‘Pūretvā tava saṅkappaṃ,
bhojayitvā tathāgataṃ;
Puna deyyāsi sambuddhaṃ,
ānandassa yasassino’.

1.4. Nimantanakathā

Akkha­das­se­bhivā­detvā,
ānandañcāpi khattiyaṃ;
Tuṭṭho pamudito hutvā,
­sambud­dha­mu­pasaṅka­miṃ.

Upasaṅkamma sambuddhaṃ,
oghatiṇ­ṇa­ma­nāsa­vaṃ;
Sirasā abhivādetvā,
idaṃ vacanamabraviṃ.

‘Vasīsa­ta­sahas­sehi,
adhivāsehi cakkhuma;
Hāsayanto mama cittaṃ,
nivesanamupehi me’.

Padumuttaro lokavidū,
āhutīnaṃ paṭiggaho;
Mama saṅ­kappa­maññāya,
adhivāsesi cakkhumā.

Adhi­vāsana­maññāya,
abhivādiya satthuno;
Haṭṭho udaggacittohaṃ,
nivesa­na­mupāga­miṃ.

1.5. Dānapaṭiyādana

Mittāmacce samānetvā,
idaṃ vacanamabraviṃ;
‘Sudullabho mayā laddho,
maṇi jotiraso yathā.

Kena taṃ pūjayissāma,
appameyyo anūpamo;
Atulo asamo dhīro,
jino appaṭipuggalo.

Tathāsamasamo ceva,
adutiyo narāsabho;
Dukkaraṃ adhikārañhi,
bud­dhānuc­chavi­kaṃ mayā.

Nānāpupphe samānetvā,
karoma pupphamaṇḍapaṃ;
Bud­dhānuc­chavi­kaṃ etaṃ,
sabbapūjā bhavissati’.

Uppalaṃ padumaṃ vāpi,
vassikaṃ adhimuttakaṃ;
Campakaṃ nāgapupphañca,
maṇḍapaṃ kārayiṃ ahaṃ.

Satā­sana­sahas­sāni,
chattacchāyāya paññapiṃ;
Pacchimaṃ āsanaṃ mayhaṃ,
adhikaṃ satamagghati.

Satā­sana­sahas­sāni,
chattacchāyāya paññapiṃ;
Paṭiyādetvā annapānaṃ,
kālaṃ ārocayiṃ ahaṃ.

Ārocitamhi kālamhi,
padumuttaro mahāmuni;
Vasīsa­ta­sahas­sehi,
nivesanamupesi me.

Dhārentaṃ uparicchattaṃ,
suphulla­puppha­maṇḍape;
Vasīsa­ta­sahas­sehi,
nisīdi purisuttamo.

‘Chatta­sata­sahas­sāni,
sata­sahas­sa­māsanaṃ;
Kappiyaṃ anavajjañca,
paṭigaṇhāhi cakkhuma’.

Padumuttaro lokavidū,
āhutīnaṃ paṭiggaho;
Mamaṃ tāretukāmo so,
sampaṭicchi mahāmuni.

1.6. Dānakathā

Bhikkhuno ekamekassa,
Paccekaṃ pattamadāsahaṃ;
Jahiṃsu sumbhakaṃ pattaṃ,
Lohapattaṃ adhārayuṃ.

Satta­rattin­divaṃ buddho,
nisīdi pupphamaṇḍape;
Bodhayanto bahū satte,
dhammacakkaṃ pavattayi.

Dhammacakkaṃ pavattento,
heṭṭhato pupphamaṇḍape;
Cullā­sīti­sahas­sā­naṃ,
dhammā­bhisa­mayo ahu.

Sattame divase patte,
padumuttaro mahāmuni;
Chat­tacchā­yāyamā­sīno,
imā gāthā abhāsatha.

1.7. Byākaraṇa

‘Anūnakaṃ dānavaraṃ,
yo me pādāsi māṇavo;
Tamahaṃ kittayissāmi,
suṇātha mama bhāsato.

Hatthī assā rathā pattī,
senā ca caturaṅginī;
Pari­vāres­santimaṃ niccaṃ,
sabba­dā­nassi­daṃ phalaṃ.

Hatthiyānaṃ assayānaṃ,
sivikā sandamānikā;
Upaṭṭhis­santimaṃ niccaṃ,
sabba­dā­nassi­daṃ phalaṃ.

Saṭṭhi rathasahassāni,
sab­bā­laṅkā­ra­bhū­sitā;
Pari­vāres­santimaṃ niccaṃ,
sabba­dā­nassi­daṃ phalaṃ.

Saṭṭhi tūriya­sahas­sāni,
bheriyo samalaṅkatā;
Vajja­yis­santimaṃ niccaṃ,
sabba­dā­nassi­daṃ phalaṃ.

Chaḷā­sīti­sahas­sāni,
nāriyo samalaṅkatā;
Vicit­ta­vatthā­bharaṇā,
āmuk­kama­ṇi­kuṇḍalā.

Aḷārapamhā hasulā,
susaññā tanumajjhimā;
Pari­vāres­santimaṃ niccaṃ,
sabba­dā­nassi­daṃ phalaṃ.

Tiṃ­sakap­pa­sahas­sāni,
devaloke ramissati;
Sahas­sak­khat­tuṃ devindo,
devarajjaṃ karissati.

Sahas­sak­khat­tuṃ rājā ca,
cakkavattī bhavissati;
Padesarajjaṃ vipulaṃ,
gaṇanāto asaṅkhiyaṃ.

Devaloke vasantassa,
puñña­kamma­samaṅ­gino;
Deva­loka­pariyan­taṃ,
ratanachattaṃ dharissati.

Icchissati yadā chāyaṃ,
chadanaṃ dussapupphajaṃ;
Imassa cittamaññāya,
nibaddhaṃ chādayissati.

Devalokā cavitvāna,
sukkamūlena codito;
Puññakammena saṃyutto,
brahmabandhu bhavissati.

Kappa­sata­sahas­samhi,
okkā­kakula­sam­bhavo;
Gotamo nāma gottena,
satthā loke bhavissati.

Sabbametaṃ abhiññāya,
gotamo sakyapuṅgavo;
Bhikkhusaṃghe nisīditvā,
etadagge ṭhapessati.

Pilinda­vaccha­nāmena,
hessati satthusāvako;
Devānaṃ asurānañca,
gandhabbānañca sakkato.

Bhikkhūnaṃ bhikkhunīnañca,
gihīnañca tatheva so;
Piyo hutvāna sabbesaṃ,
viha­rissati­nāsavo’.

1.8. Dānā­nisaṃ­sa­kathā

Satasahasse kataṃ kammaṃ,
phalaṃ dassesi me idha;
Sumutto saravegova,
kilese jhāpayī mama.

Aho me sukataṃ kammaṃ,
puññakkhette anuttare;
Yattha kāraṃ karitvāna,
pattomhi acalaṃ padaṃ.

Anūnakaṃ dānavaraṃ,
adāsi yo hi māṇavo;
Ādipubbaṅgamo āsi,
tassa dānassidaṃ phalaṃ.

1.8.1. Chattānisaṃsa

Chatte ca sugate datvā,
saṃghe gaṇavaruttame;
Aṭṭhānisaṃse anubhomi,
kammā­nuc­chavike mama.

Sītaṃ uṇhaṃ na jānāmi,
rajojallaṃ na limpati;
Anupaddavo anīti ca,
homi apacito sadā.

Sukhumac­chaviko homi,
visadaṃ hoti mānasaṃ;
Chatta­sata­sahas­sāni,
bhave saṃsarato mama.

Sab­bā­laṅkā­ra­yuttāni,
tassa kammassa vāhasā;
Imaṃ jātiṃ ṭhapetvāna,
matthake dhārayanti me.

Kasmā imāya jātiyā,
natthi me chattadhāraṇā;
Mama sabbaṃ kataṃ kammaṃ,
vimutti­chat­tapattiyā.

1.8.2. Dussānisaṃsa

Dussāni sugate datvā,
saṃghe gaṇavaruttame;
Aṭṭhānisaṃse anubhomi,
kammā­nuc­chavike mama.

Suvaṇṇavaṇṇo virajo,
sappabhāso patāpavā;
Siniddhaṃ hoti me gattaṃ,
bhave saṃsarato mama.

Dussa­sata­sahas­sāni,
setā pītā ca lohitā;
Dhārenti matthake mayhaṃ,
dus­sadānas­sidaṃ phalaṃ.

Koseyya­kamba­li­yāni,
kho­ma­kappā­si­kāni ca;
Sabbattha paṭilabhāmi,
tesaṃ nissandato ahaṃ.

1.8.3. Pattānisaṃsa

Patte sugate datvāna,
saṃghe gaṇavaruttame;
Dasānisaṃse anubhomi,
kammā­nuc­chavike mama.

Suvaṇṇathāle maṇithāle,
rajatepi ca thālake;
Lohitaṅgamaye thāle,
paribhuñjāmi sabbadā.

Anupaddavo anīti ca,
homi apacito sadā;
Lābhī annassa pānassa,
vatthassa sayanassa ca.

Na vinassanti me bhogā,
ṭhitacitto bhavāmahaṃ;
Dhammakāmo sadā homi,
appakleso anāsavo.

Devaloke manusse vā,
anubandhā ime guṇā;
Chāyā yathāpi rukkhassa,
sabbattha na jahanti maṃ.

1.8.4. Vāsiānisaṃsa

Cit­ta­bandha­na­sambad­dhā,
sukatā vāsiyo bahū;
Datvāna buddha­seṭṭhassa,
saṃghassa ca tathevahaṃ.

Aṭṭhānisaṃse anubhomi,
kammā­nuc­chavike mama;
Sūro homavisārī ca,
vesārajjesu pāramī.

Dhitivīriyavā homi,
paggahītamano sadā;
Kilesac­cheda­naṃ ñāṇaṃ,
sukhumaṃ atulaṃ suciṃ;
Sabbattha paṭilabhāmi,
tassa nissandato ahaṃ.

1.8.5. Sattha­kā­nisaṃsa

Akakkase apharuse,
sudhote satthake bahū;
Pasannacitto datvāna,
buddhe saṃghe tatheva ca.

Pañcānisaṃse anubhomi,
kammā­nuc­chavike mama;
Kalyāṇamittaṃ vīriyaṃ,
khantiñca mettasatthakaṃ.

Taṇhāsallassa chinnattā,
paññāsatthaṃ anuttaraṃ;
Vajirena samaṃ ñāṇaṃ,
tesaṃ nissandato labhe.

1.8.6. Sūciānisaṃsa

Sūciyo sugate datvā,
saṃghe gaṇavaruttame;
Pañcānisaṃse anubhomi,
kammā­nuc­chavike mama.

Na saṃsayo kaṅkhacchedo,
abhirūpo ca bhogavā;
Tikkhapañño sadā homi,
saṃsaranto bhavābhave.

Gambhīraṃ nipuṇaṃ ṭhānaṃ,
atthaṃ ñāṇena passayiṃ;
Vajiraggasamaṃ ñāṇaṃ,
hoti me tamaghātanaṃ.

1.8.7. Nakhac­cheda­nā­nisaṃsa

Nakhacchedane sugate,
datvā saṃghe gaṇuttame;
Pañcānisaṃse anubhomi,
kammā­nuc­chavike mama.

Dāsidāse gavasse ca,
bhatake nāṭake bahū;
Nhāpite bhattake sūde,
sabbattheva labhāmahaṃ.

1.8.8. Vidhūpa­na­tāla­vaṇṭā­nisaṃsa

Vidhūpane sugate datvā,
tālavaṇṭe ca sobhane;
Aṭṭhānisaṃse anubhomi,
kammā­nuc­chavike mama.

Sītaṃ uṇhaṃ na jānāmi,
pariḷāho na vijjati;
Darathaṃ nābhijānāmi,
cit­tasan­tā­pa­naṃ mama.

Rāgaggi dosamohaggi,
mānaggi diṭṭhiaggi ca;
Sabbaggī nibbutā mayhaṃ,
tassa nissandato mama.

1.8.9. Morahattha-cāmara

Morahatthe cāmariyo,
datvā saṃghe gaṇuttame;
Upasan­ta­kileso­haṃ,
viharāmi anaṅgaṇo.

1.8.10. Parissāvana-dhammakara

Parissāvane sugate,
datvā dhamma­ka­ruttame;
Pañcānisaṃse anubhomi,
kammā­nuc­chavike mama.

Sabbesaṃ samatikkamma,
dibbaṃ āyuṃ labhāmahaṃ;
Appasayho sadā homi,
corapaccat­thi­kehi vā.

Satthena vā visena vā,
vihesampi na kubbate;
Antarāmaraṇaṃ natthi,
tesaṃ nissandato mama.

1.8.11. Tela­dhārā­ni­saṃsa

Teladhāre sugate datvā,
saṃghe gaṇavaruttame;
Pañcānisaṃse anubhomi,
kammā­nuc­chavike mama.

Sucārurūpo subhaddo,
susamug­ga­ta­mānaso;
Avikkhittamano homi,
sabbārakkhehi rakkhito.

1.8.12. Sūci­gharā­nisaṃsa

Sūcighare sugate datvā,
saṃghe gaṇavaruttame;
Tīṇānisaṃse anubhomi,
kammā­nuc­chavike mama.

Cetosukhaṃ kāyasukhaṃ,
iriyāpathajaṃ sukhaṃ;
Ime guṇe paṭilabhe,
tassa nissandato ahaṃ.

1.8.13. Aṃsa­baddhā­nisaṃsa

Aṃsabaddhe jine datvā,
saṃghe gaṇavaruttame;
Tīṇānisaṃse anubhomi,
kammā­nuc­chavike mama.

Saddhamme gādhaṃ vindāmi,
Sarāmi dutiyaṃ bhavaṃ;
Sabbattha succhavī homi,
Tassa nissandato ahaṃ.

1.8.14. Kāya­bandha­nā­nisaṃsa

Kāyabandhe jine datvā,
saṃghe gaṇavaruttame;
Chānisaṃse anubhomi,
kammā­nuc­chavike mama.

Samādhīsu na kampāmi,
vasī homi samādhisu;
Abhejjapariso homi,
ādeyyavacano sadā.

Upaṭṭhitasati homi,
tāso mayhaṃ na vijjati;
Devaloke manusse vā,
anubandhā ime guṇā.

1.8.15. Ādhāra­kā­nisaṃsa

Ādhārake jine datvā,
saṃghe gaṇavaruttame;
Pañcavaṇṇehi dāyādo,
acalo homi kenaci.

Ye keci me sutā dhammā,
sati­ñāṇap­pa­bodhanā;
Dhatā me na vinassanti,
bhavanti suvinicchitā.

1.8.16. Bhājanānisaṃsa

Bhājane paribhoge ca,
datvā buddhe gaṇuttame;
Tīṇānisaṃse anubhomi,
kammā­nuc­chavike mama.

Soṇṇamaye maṇimaye,
athopi phalikāmaye;
Lohitaṅgamaye ceva,
labhāmi bhājane ahaṃ.

Bhariyā dāsadāsī ca,
hat­thissara­thapattike;
Itthī patibbatā ceva,
paribhogāni sabbadā.

Vijjā mantapade ceva,
vividhe āgame bahū;
Sabbaṃ sippaṃ nisāmemi,
paribhogāni sabbadā.

1.8.17. Thālakānisaṃsa

Thālake sugate datvā,
saṃghe gaṇavaruttame;
Tīṇānisaṃse anubhomi,
kammā­nuc­chavike mama.

Soṇṇamaye maṇimaye,
athopi phalikāmaye;
Lohitaṅgamaye ceva,
labhāmi thālake ahaṃ.

Asatthake phalamaye,
atho pok­kha­ra­pattake;
Madhupā­na­kasaṅ­khe ca,
labhāmi thālake ahaṃ.

Vatte guṇe paṭipatti,
ācārakiriyāsu ca;
Ime guṇe paṭilabhe,
tassa nissandato ahaṃ.

1.8.18. Bhesaj­jā­nisaṃsa

Bhesajjaṃ sugate datvā,
saṃghe gaṇavaruttame;
Dasānisaṃse anubhomi,
kammā­nuc­chavike mama.

Āyuvā balavā dhīro,
vaṇṇavā yasavā sukhī;
Anupaddavo anīti ca,
homi apacito sadā;
Na me piyaviyogatthi,
tassa nissandato mama.

1.8.19. Upāhanānisaṃsa

Upāhane jine datvā,
saṃghe gaṇavaruttame;
Tīṇānisaṃse anubhomi,
kammā­nuc­chavike mama.

Hatthiyānaṃ assayānaṃ,
sivikā sandamānikā;
Saṭṭhi­sata­sahas­sāni,
parivārenti maṃ sadā.

Maṇimayā tambamayā,
soṇṇa­rajata­pādukā;
Nibbattanti paduddhāre,
bhave saṃsarato mama.

Niyāmaṃ sati dhāvanti,
āgu­ācāra­so­dha­naṃ;
Ime guṇe paṭilabhe,
tassa nissandato ahaṃ.

1.8.20. Pādukānisaṃsa

Pāduke sugate datvā,
saṃghe gaṇavaruttame;
Iddhi­pāduka­māruyha,
viharāmi yadicchakaṃ.

1.8.21. Udaka­puñcha­nā­nisaṃsa

Udaka­puñcha­na­coḷe,
datvā buddhe gaṇuttame;
Pañcānisaṃse anubhomi,
kammā­nuc­chavike mama.

Suvaṇṇavaṇṇo virajo,
sappabhāso patāpavā;
Siniddhaṃ hoti me gattaṃ,
rajojallaṃ na limpati;
Ime guṇe paṭilabhe,
tassa nissandato ahaṃ.

1.8.22. Katta­ra­daṇḍā­nisaṃsa

Kattaradaṇḍe sugate,
datvā saṃghe gaṇuttame;
Chānisaṃse anubhomi,
kammā­nuc­chavike mama.

Puttā mayhaṃ bahū honti,
tāso mayhaṃ na vijjati;
Appasayho sadā homi,
sabbārakkhehi rakkhito;
Khalitampi na jānāmi,
abhantaṃ mānasaṃ mama.

1.8.23. Osa­dhañjanā­nisaṃsa

Osadhaṃ añjanaṃ datvā,
buddhe saṃghe gaṇuttame;
Aṭṭhānisaṃse anubhomi,
kammā­nuc­chavike mama.

Visālanayano homi,
setapīto ca lohito;
Anāvi­la­pasan­nak­kho,
sab­baroga­vi­vajjito.

Labhāmi dibbanayanaṃ,
paññācakkhuṃ anuttaraṃ;
Ime guṇe paṭilabhe,
tassa nissandato ahaṃ.

1.8.24. Kuñcikānisaṃsa

Kuñcike sugate datvā,
saṃghe gaṇavaruttame;
Dhammad­vāra­vivara­ṇaṃ,
labhāmi ñāṇakuñcikaṃ.

1.8.25. Kuñ­ci­kā­gharā­ni­saṃsa

Kuñcikānaṃ ghare datvā,
buddhe saṃghe gaṇuttame;
Dvānisaṃse anubhomi,
kammā­nuc­chavike mama;
Appakodho anāyāso,
saṃsaranto bhave ahaṃ.

1.8.26. Āyogānisaṃsa

Āyoge sugate datvā,
saṃghe gaṇavaruttame;
Pañcānisaṃse anubhomi,
kammā­nuc­chavike mama.

Samādhīsu na kampāmi,
vasī homi samādhisu;
Abhejjapariso homi,
ādeyyavacano sadā;
Jāyati bhogasampatti,
bhave saṃsarato mama.

1.8.27. Dhūma­nettā­nisaṃsa

Dhūmanette jine datvā,
saṃghe gaṇavaruttame;
Tīṇānisaṃse anubhomi,
kammā­nuc­chavike mama.

Sati me ujukā hoti,
susambandhā ca nhāravo;
Labhāmi dibbanayanaṃ,
tassa nissandato ahaṃ.

1.8.28. Dīpa­dhārā­ni­saṃsa

Dīpadhāre jine datvā,
saṃghe gaṇavaruttame;
Tīṇānisaṃse anubhomi,
kammā­nuc­chavike mama.

Jātimā aṅgasampanno,
paññavā buddhasammato;
Ime guṇe paṭilabhe,
tassa nissandato ahaṃ.

1.8.29. Tumbaka-karaṇḍa

Tumbake ca karaṇḍe ca,
datvā buddhe gaṇuttame;
Dasānisaṃse anubhomi,
kammā­nuc­chavike mama.

Sugutto sukhasamaṅgī,
Mahāyaso tathāgati;
Vipattivigato sukhumālo,
Sab­bīti­pari­vajjito.

Vipule ca guṇe lābhī,
samāva calanā mama;
Suvi­vajji­ta­ubbego,
tumbake ca karaṇḍake.

Labhāmi caturo vaṇṇe,
hat­thissara­tanāni ca;
Tāni me na vinassanti,
tumbadāne idaṃ phalaṃ.

1.8.30. Malahara­ṇā­nisaṃsa

Malaharaṇiyo datvā,
buddhe saṃghe gaṇuttame;
Pañcānisaṃse anubhomi,
kammā­nuc­chavike mama.

Sabba­lak­kha­ṇa­sam­panno,
āyu­paññā­sa­māhito;
Sabbā­yāsavi­nimutto,
kāyo me hoti sabbadā.

1.8.31. Pip­pha­lā­nisaṃsa

Taṇudhāre sunisite,
saṃghe datvāna pipphale;
Kilesakantanaṃ ñāṇaṃ,
labhāmi atulaṃ suciṃ.

1.8.32. Saṇḍāsānisaṃsa

Saṇḍāse sugate datvā,
saṃghe gaṇavaruttame;
Kilesa­bhañ­janaṃ ñāṇaṃ,
labhāmi atulaṃ suciṃ.

1.8.33. Natthu­kā­nisaṃsa

Natthuke sugate datvā,
saṃghe gaṇavaruttame;
Aṭṭhānisaṃse anubhomi,
kammā­nuc­chavike mama.

Saddhaṃ sīlaṃ hiriñcāpi,
atha ottappiyaṃ guṇaṃ;
Sutaṃ cāgañca khantiñca,
paññaṃ me aṭṭhamaṃ guṇaṃ.

1.8.34. Pīṭhakānisaṃsa

Pīṭhake sugate datvā,
saṃghe gaṇavaruttame;
Pañcānisaṃse anubhomi,
kammā­nuc­chavike mama.

Ucce kule pajāyāmi,
mahābhogo bhavāmahaṃ;
Sabbe maṃ apacāyanti,
kitti abbhuggatā mama.

Kappa­sata­sahas­sāni,
pallaṅkā caturassakā;
Parivārenti maṃ niccaṃ,
saṃvibhāgarato ahaṃ.

1.8.35. Bhisiānisaṃsa

Bhisiyo sugate datvā,
saṃghe gaṇavaruttame;
Chānisaṃse anubhomi,
kammā­nuc­chavike mama.

Sama­su­gatto­pacito,
muduko cārudassano;
Labhāmi ñāṇaparivāraṃ,
bhi­sidānas­sidaṃ phalaṃ.

Tūlikā vikatikāyo,
kaṭṭissā cittakā bahū;
Varapotthake kambale ca,
labhāmi vividhe ahaṃ.

Pāvārike ca muduke,
mudukā­jina­veṇiyo;
Labhāmi vividhatthāre,
bhi­sidānas­sidaṃ phalaṃ.

Yato sarāmi attānaṃ,
yato pattosmi viññutaṃ;
Atuccho jhānamañcomhi,
bhi­sidānas­sidaṃ phalaṃ.

1.8.36. Bibbo­ha­nā­nisaṃsa

Bibbohane jine datvā,
saṃghe gaṇavaruttame;
Chānisaṃse anubhomi,
kammā­nuc­chavike mama.

Uṇṇike padumake ca,
atho lohitacandane;
Bibbohane upādhemi,
uttamaṅgaṃ sadā mama.

Aṭṭhaṅgike maggavare,
sāmaññe caturo phale;
Tesu ñāṇaṃ uppādetvā,
vihare niccakālikaṃ.

Dāne dame saṃyame ca,
appamaññāsu rūpisu;
Tesu ñāṇaṃ uppādetvā,
vihare sabbakālikaṃ.

Vatte guṇe paṭipatti,
ācārakiriyāsu ca;
Tesu ñāṇaṃ uppādetvā,
vihare sabbadā ahaṃ.

Caṅkame vā padhāne vā,
vīriye bodhipakkhiye;
Tesu ñāṇaṃ uppādetvā,
viharāmi yadicchakaṃ.

Sīlaṃ samādhi paññā ca,
vimutti ca anuttarā;
Tesu ñāṇaṃ uppādetvā,
viharāmi sukhaṃ ahaṃ.

1.8.37. Phala­pīṭhā­nisaṃsa

Phalapīṭhe jine datvā,
saṃghe gaṇavaruttame;
Dvānisaṃse anubhomi,
kammā­nuc­chavike mama.

Soṇṇamaye maṇimaye,
dantasāramaye bahū;
Pallaṅkaseṭṭhe vindāmi,
phala­pīṭhas­sidaṃ phalaṃ.

1.8.38. Pāda­pīṭhā­nisaṃsa

Pādapīṭhe jine datvā,
saṃghe gaṇavaruttame;
Dvānisaṃse anubhomi,
kammā­nuc­chavike mama;
Labhāmi bahuke yāne,
pāda­pīṭhas­sidaṃ phalaṃ.

Dāsī dāsā ca bhariyā,
ye caññe anujīvino;
Sammā paricarante maṃ,
pāda­pīṭhas­sidaṃ phalaṃ.

1.8.39. Telabbhañ­janā­nisaṃsa

Telaabbhañjane datvā,
saṃghe gaṇavaruttame;
Pañcānisaṃse anubhomi,
kammā­nuc­chavike mama.

Abyādhitā rūpavatā,
khippaṃ dhamma­ni­santitā;
Lābhitā annapānassa,
āyupañcamakaṃ mama.

1.8.40. Sappi­telā­nisaṃsa

Sappitelañca datvāna,
saṃghe gaṇavaruttame;
Pañcānisaṃse anubhomi,
kammā­nuc­chavike mama.

Thāmavā rūpasampanno,
pahaṭṭhatanujo sadā;
Abyādhi visado homi,
sappi­telas­sidaṃ phalaṃ.

1.8.41. Mukha­so­dha­na­kā­nisaṃsa

Mukha­so­dha­na­kaṃ datvā,
buddhe saṃghe gaṇuttame;
Pañcānisaṃse anubhomi,
kammā­nuc­chavike mama.

Visuddhakaṇṭho madhurassaro,
Kāsa­sāsavi­vajjito;
Uppalagandho mukhato,
Upavāyati me sadā.

1.8.42. Dadhiānisaṃsa

Dadhiṃ datvāna sampannaṃ,
buddhe saṃghe gaṇuttame;
Bhuñjāmi amataṃ bhattaṃ,
varaṃ kāyagatāsatiṃ.

1.8.43. Madhuānisaṃsa

Vaṇṇa­gandha­ra­so­petaṃ,
madhuṃ datvā jine gaṇe;
Anūpamaṃ atuliyaṃ,
pive muttirasaṃ ahaṃ.

1.8.44. Rasānisaṃsa

Yathābhūtaṃ rasaṃ datvā,
buddhe saṃghe gaṇuttame;
Caturo phale anubhomi,
kammā­nuc­chavike mama.

1.8.45. Anna­pānā­nisaṃsa

Annaṃ pānañca datvāna,
buddhe saṃghe gaṇuttame;
Dasānisaṃse anubhomi,
kammā­nuc­chavike mama.

Āyuvā balavā dhīro,
vaṇṇavā yasavā sukhī;
Lābhī annassa pānassa,
sūro paññāṇavā sadā;
Ime guṇe paṭilabhe,
saṃsaranto bhave ahaṃ.

1.8.46. Dhūpānisaṃsa

Dhūpaṃ datvāna sugate,
saṃghe gaṇavaruttame;
Dasānisaṃse anubhomi,
kammā­nuc­chavike mama.

Sugandhadeho yasavā,
sīghapañño ca kittimā;
Tikkhapañño bhūripañño,
hāsa­gam­bhī­ra­paññavā.

Vepulla­javana­pañño,
saṃsaranto bhavābhave;
Tasseva vāhasā dāni,
patto santisukhaṃ sivaṃ.

1.9. ­Sādhāra­ṇā­nisaṃsa

Kilesā jhāpitā mayhaṃ,
bhavā sabbe samūhatā;
Nāgova bandhanaṃ chetvā,
viharāmi anāsavo.

Svāgataṃ vata me āsi,
mama buddhassa santike;
Tisso vijjā anuppattā,
kataṃ buddhassa sāsanaṃ.

Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṃ buddhassa sāsanaṃ”.

Itthaṃ sudaṃ āyasmā pilindavaccho thero imā gāthāyo abhāsitthāti.

Pilinda­vacchat­theras­sāpadā­naṃ paṭhamaṃ.